2012年7月7日星期六

倫敦金銷售

阿強:你喜歡投資黃金嗎?
止凡:點解咁問?
阿強:我而家係黃金買賣 agent


止凡:你唔係做室內設計生意咩?
阿強:冇做了
止凡:阿叔打本俾你做生意, 做左一年又唔做? 點解呀?
阿強:果間有錢派的, 賺硬
止凡:你話而家做黃金買賣agent果間?
阿強:係呀
止凡:做 agent會賺硬?
阿強:係個客賺硬
止凡:而家你一個月搵幾多呀?
阿強:而家未到6位數, 要做多3-6月先有6位收入, 而家都係5位數字
止凡:即係幾多 basic, 幾多commissions?
阿強:我地唔係咁計的, 係派錢, 唔係 basic果隻, 明唔明?
止凡:分紅?
阿強:唔係, 你係唔係有興趣先? 冇興趣, 我便唔解釋了
止凡:想知多d...
阿強:你會唔會投資倫敦金先?
止凡:係唔係你先買左d金...
阿強:買賣均可
止凡:你買左幾多?
阿強:我幫客買
止凡:你自己無買?
阿強:當然有啦
止凡:咁你自己買左幾多?
阿強:一個倉, 由 2萬至 50萬都可以, 不過而家都係賺幾萬便算, 我唔會太博, 安全, 賺錢便算
止凡:咁即係買左幾多?
阿強:一日定, 一個月? 都唔明你問咩...
止凡:當一個月啦
阿強:不如我問你啦, ok? 你開倉額係幾多先? 2萬, 5萬, 50萬都唔同啦
止凡:你唔講多d, 我點知點運作呢...派錢點派法呢?
阿強:你答我啦, ok?
止凡:派錢的話, 間公司賺乜呢?
阿強:2萬, 5萬, 10萬, 50萬, 邊個?
止凡:用你開果個解釋一次啦
阿強:一般都 10萬, 每日平均都係玩 4-5手, 一個月大約 100手, 跟我的, 可以賺 8000-20000, 再派錢 2000 左右
止凡:點賺法?
阿強:呢個係我地既商業秘密, 你唔信,可以看我地既 trading statement, 是每日都賺的
止凡:又唔講得呀?
阿強:當然 trading 方法係商業秘密, 呢個你只可以看我們既 trading history做證明
止凡:你知唔知邊個係巴菲特?
阿強:當然
止凡:知唔知佢年回報率係幾多呀?
阿強:你咪學佢囉, 你有興趣先找我啦, 我保證你出面找唔到這樣好既回報
止凡:問你知唔知姐...唔係話乜, 做個比較
阿強:你有冇興趣開戶先?
止凡:個客問野, 唔好三句唔埋就問個客有冇興趣先...咁sell唔到架
阿強:ok, 你問啦
止凡:個客覺得你乜都唔講得, 又好似乜都唔知咁, 只係識叫我開戶...咁點會理你呢? 係唔係?
阿強:都話可以看statement, 除了trading method 之外, 什麼都講得, ok?
止凡:賭場都有開彩記錄睇, 睇完前幾十舖開過乜, 係唔係知道下一舖開乜? 所以睇statement history係無用
阿強:你咁講...........d 大戶死晒啦
止凡:好多基金都係咁sell, 過去5年好勁, 買左先跌
阿強:你唔信, 可以用1, 2 萬開戶試下先
止凡:咁得意? 唔信仲開戶? 你又叫人開戶...老毛病
阿強:咁你自己出去找, 保證你一定沒有此回報
止凡:你未答我知唔知巴菲特回報率幾多?
阿強:有時 80%, 有時負數
止凡:平均年回報呢?
阿強:20-30%
止凡:咁你地呢?
阿強:25%以上, ok?
止凡:點解又得 25%?
阿強:1年, 多過 25%
止凡:頭先唔係話 10萬, 一個月就有8000-20000? 再派 2000?
阿強:係, 可以去到 50%回報
止凡:條數點計? 你d客唔一定你講乜都聽...個客可能好simple, 但又可能投資好勁, 你唔知架...
阿強:問題是邊個打盤, 看盤手功力好唔好..
止凡:個客唔識你d人, 什麼人什麼功力...佢只會睇數字, 同解釋
阿強:ok
止凡:d客唔識你又要信你俾錢你? 咁樣sell唔到, 我想知的都是最基本的
阿強:唔係, 你自己打盤, 定由我地打盤先?
止凡:當俾你地打盤啦...年回報多少?
阿強:我地打盤要 50萬開戶, 因為而家有幾個大客, 我地成 team人, 日夜輪更的
止凡:我諗你要明白你個客問乜...唔係不停講你自己點運作, 個客問的就係最重要決定買唔買的因素
阿強:ok, 如果 50萬, 賺 25萬問題不大, 如果你自己打盤便有難度
止凡:咁又話10萬...一個月賺 8000-20000? 再派 2000?
阿強:係, 不過你要自己勤力打盤, 你要跟我地
止凡:即係幾多年回報率?
阿強:我地睇唔到細倉, 可以有100%
止凡:一年回報100%呀?
阿強:係, 如果你完全跟足我地既打盤指引
止凡:未來 20年每年都有?
阿強:當然, 永久保證, 除非公司執笠
止凡:投資50萬...20年後會有幾多?
阿強:1000
止凡:1000萬?
阿強:係, 如果你有興趣, 我可以留你電話俾我組長, 佢會連絡你
止凡:應該係 5200億呀, 你好似唔係好識計回報率喎
阿強:唔係, 你當每年 double上
止凡:你公司點會執笠...平均年回報率高過巴菲特咁多...
阿強:我係每件賺幾十萬便算, 如果你有興趣, 我可以留你電話俾我組長, 佢會連絡你
止凡:又係咁...個客都未搞清楚, 又叫個客留電話?
止凡:拿, 50萬開始...100%回報, 第一年就賺 50萬
止凡:第二年開始, 總共就可以投資 100萬, 再 100%回報, 第二年就賺多100萬...
止凡:第三年開始, 再投入去, 200萬變 400萬...400萬變 800萬...
止凡:20年之後就有 5200億!
阿強:你決定啦...


後記:

之後阿強覺得我運吉, 無再覆我。阿強今年 20多歲, 無記錯的話, 這位阿強做了這份工不出一年, 對本身公司的了解也未必十分充足。其實我不是真的有興趣買, 只是好奇希望了解一下這些公司怎樣運作, 同時了解阿強是否跌進種金或傳銷之類的陷阱。希望阿強賺得多, 而該公司亦能在不久的將來成為全球資產值最高的公司。

19 則留言:

  1. 匿名7.7.12

    勁!整份語錄超詳盡,你可能問佢如果打麻省,打一二百萬一底,番番上,20番是多少錢?他有可能答到你。哈哈!=.^

    回覆刪除
    回覆
    1. 可能麻雀就識計, 但回報率就唔識計, 因為佢唔知原來有關係

      刪除
  2. 匿名8.7.12

    其實個個呀強知吾知自己係度講緊咩?
    仲勁過/快過種金.馬多夫都收得皮/w\

    回覆刪除
    回覆
    1. 可能佢真係無諗過d客會反問佢咁多野, 以為佢講賺幾多幾多, d客就信晒佢同即買

      刪除
  3. 匿名8.7.12

    根本完全答非所問,懶神秘咁,語氣又串,通常呢D人我都避之則吉,
    止凡兄你可以同佢傾到咁耐真係好野!
    完野冇DATA,D回報率UP得就UP,一時一樣,叫佢個組長同佢TRAIN多幾年先出山昆人啦!

    回覆刪除
    回覆
    1. 我諗佢都唔會做得耐, 一係就sell唔到客, 一係就自己錢都俾呃清

      刪除
  4. 匿名8.7.12

    最近電視開始賣廣告,叫巿民買倫敦金要小心,暑期工求職時亦要小心,本來係打工變左俾人騙去投資。(財務自由瘋子)

    回覆刪除
  5. 匿名9.7.12

    都係果句, 如果咁勁, 使乜搵街外錢, 自已抄自已都夠和味 XD

    回覆刪除
    回覆
    1. 同意, 回報高成咁, 根本不用益外人

      刪除
  6. 匿名9.7.12

    十几年前我初到貴境,當時妹妹仔一個。到伦敦金公司見工结果變成投资,两天不到嗰四萬文就没了還要倒欠九千。想不到那些骗人的公司到今天還有。貪念害死人,還有很多像我當年那樣的傻瓜。

    回覆刪除
    回覆
    1. 被人呃過, 成世都記得, 日後可能防備心會強一點

      刪除
  7. 貪字得個貧...

    回覆刪除
    回覆
    1. 可能呢位朋友會好富呢...

      刪除
  8. 大家做倫敦金/銀投資時要特別小心!
    設勿將閣下的該投資戶口密碼交給任何人呀!
    包括閣下的經紀呀.
    因為閣下要對閣下的投資負責任呀!而且投資前要問清楚呀!
    請勿心急呀!即使閣下的經紀催促做買賣決定下也先停下來,想清楚呀!
    小心做金融大鱷點心呀!

    警訊話:[騙局源於貪念];小心有[天遇]倫敦金騙局呀!

    回覆刪除
    回覆
    1. 有人在2010年中不幸幫襯天譽國際金業有限公司( Prestige ) 的經紀後出事啊.

      電郵地址: admin@pibullion.com
      QQ : 4006762425
      網址: http://www.prestigegroup.com.hk/index.php

      有人在那裡投資倫敦金,被那公司姓陳及姓林兩女經紀遊說交密碼使她們代為投資,但原來她們投資經驗好差,好容易就輸清光.所以做倫敦金買賣就不可以假手於人呀,要親力親為呀!
      之後竟然被自稱那公司男職員電話警告不可以投訴啊呀!
      希望那公司加強監管經紀啦.

      刪除
    2. 多謝提醒!

      刪除
  9. 我嗰個好少少,最少識講平均線之類的術語!

    回覆刪除
    回覆
    1. 說平均線,的確看似好一點點,哈哈。
      可惜其實他們不太懂自己在說什麼。

      刪除

熱門文章